पूर्व भारतीय राजदूत तथा हाल भारतका विदेश सचिव विनयमाेहन क्वात्राले पूर्व प्रधानमन्त्रीहरु शेरबहादुर देउवा, माधवकुमार नेपाल र पुष्पकमल दाहाललाई सम्बाेधन गर्दैगरेकाे फाेटाे केही दिनदेखि सामाजिक सञ्जालमा भाइरल भएकाे छ ।

नेकपा एमालेकी केन्द्रीय सदस्य सुजिता शाक्यले गत फागुन १८ गते फेसबुकमा उक्त तस्बिर सेयर गर्दै यस्ताे स्टाटस पाेस्ट गरिन् : 

तस्बिर आफै बाेल्छ गठबन्धन किन फेरिएछ ? भारतबाट आयातित विषादीयुक्त तरकारीमा क्वारेन्टाइन जाँच किन राेकिएछ ? राष्ट्रपतिमा अरु हाेइन कांग्रेस नै किन चाहिएछ ? यी सबैका विरुद्ध जनता र राष्ट्रलाई बचाउन एमाले ढाल बनेर उभिँदा उनका विरुद्ध घेराबन्दी गर्न जनविराेधीहरु सबै एक भएर धुइरिएछ ।

त्यस्तै ट्वीटर प्रयाेगकर्ता @Dr_Gothe ले पनि साेही तस्बिर सहित “भारतीय विदेश सचिव क्वात्राले यसरी क्लास दिएपछि बनेकाे आठ दलीय गठबन्धनले अब देशलाई कुन खाल्डाेमा हाल्ने हाे, हेर्दै जाउँ” भन्दै ट्वीट गरेका छन् । 

ट्वीटर, फेसबुक लगायतका सामाजिक सञ्जालमा भाइरल उक्त फाेटाेकाे वास्तविकता के हाे भनी हामीले तथ्य जाँच गरेका छाैँ ।

अहिलेकाे सन्दर्भ के हाे ?

यतिखेर दुई कारणले उक्त फाेटाे सामाजिक सञ्जालमा सेयर गरिएकाे छ । नेपालमा भारतीय राजदूतका रुपमा दुई वर्ष बिताएका भारतीय विदेश सचिव क्वात्राले गत फागुन पहिलाे साता नेपालकाे तीन दिने भ्रमण गरेका थिए । भारतीय विदेश सचिवका रुपमा क्वात्राकाे पहिलाे नेपाल भ्रमणमा द्विपक्षीय विषयमा छलफल हुनुका साथै भेटघाटका क्रमम उनले दलीय गठबन्धन र राष्ट्रपतिकाे निर्वाचन सम्बन्धमा समेत चासाे राखेकाे समाचारमा जनाइएकाे छ ।

राष्ट्रपतिकाे निर्वाचनमा कुन दलकाे उम्मेदवारलाई माओवादीले समर्थन गर्ने भन्ने विषयमा असमझदारी बढ्दै जाँदा नेकपा एमाले र माओवादीकाे सत्तारुढ गठबन्धन भत्किएकाे थियाे । फागुन २५ गते हुने राष्ट्रपतिकाे निर्वाचनमा माओवादीले नेपाली कांग्रेसका बरिष्ठ नेता रामचन्द्र पाैडेललाई समर्थन गर्ने जनाइसकेकाे छ भने एमालले पूर्व सभामुख सुवासचन्द्र नेम्बाङलाई उम्मेदवार बनाएकाे छ । यसै सन्दर्भमा माथिकाे तस्बिर सामाजिक सञ्जालमा फैलाइएकाे हाे । 

फाेटाे खिच्दाकाे सन्दर्भ के थियाे ?

नेपालमा आफ्नाे कार्यकाल सकिएपछि स्वदेश फर्किनु अघि २०७८ साल चैत २९ गते क्वात्राले काठमाडाैँस्थित भारतीय दूतावासमा विदाई कार्यक्रमकाे आयाेजना गरेका थिए । नेपाल खबरमा प्रकाशित फाेटाे र समाचार अनुसार उक्त कार्यक्रमममा पूर्व प्रधानमन्त्रीहरु शेरबहादुर देउवा, माधवकुमार नेपाल र पुष्पकमल दाहाल, पूर्व सभामुख सुवासचन्द्र नेम्बाङ लगायतका नेता सहभागी थिए । 

सामाजिक सञ्जालमा अहिले भाइरल सामग्रीमा एमालेबाट राष्ट्रपतिका उम्मेदवार नेम्बाङकाे तस्बिर हटाइएकाे छ । तसर्थ याे सामग्री ताेडमाेड गरी सन्दर्भ हटाइ भ्रम फैलाइएकाे नेपाल चेककाे निष्कर्ष छ । 

दाबी	दाबीकर्ता	नेपाल चेक निष्कर्ष
भारतीय विदेश सचिव क्वात्राले गठबन्धनका नेतालाई एक ठाउँमा राखेर लेक्चर दिएकाे तस्बिर।	सामाजिक सञ्जाल प्रयोगकर्ता	भ्रामक