गत कात्तिक १७ गते मध्यरातमा नेपालमा कर्णाली प्रदेशको जाजरकोटमा गएको भूकम्पमा परी कम्तिमा १५७ जनाको निधन भयो। जाजरकोटको रामीडाँडा केन्द्रविन्दु भएर गएको ६.४ म्याग्निच्युडको भूकम्पका कारण जाजरकोट र रुकुम पश्चिमका १० हजारभन्दा बढी घरमा क्षति पुगेको छ । 

भूकम्प गएलगत्तै सामाजिक सञ्जाल प्रयाेगकर्ताहरूले विभिन्न भिडियो र फोटो सेयर गरेका थिए। ती दृश्य उक्त भूकम्पपछिको क्षति र त्रासको भएकाे दाबी गरिएकाे थियाे। 

गत कात्तिक १८ गते @master.piece69 नामक टिकटक प्रयोगकर्ताले २१ सेकेन्डकाे भिडियाेसहित यस्ताे स्टाटस पाेस्ट गरेका थिए, “#SadNews जाजरकोटलाई केन्द्रविन्दु बनाएर हिजो मध्य राति भएको भूकम्पमा परी जाजरकोट र रुकुममा गरेर अहिलेसम्म १०० जनाको ज्यान गएको प्रहरीले जनाएको छ । यस्तै करीब २४० जना घाइते भएका छन् ।”

भिडियोसँगै “जिन्दगीको के छ र भर” भन्ने गीत पनि समावेश छ । भिडियाेमा खुल्ला स्थानमा मानिस छन् भने तीन तले पक्की घर ढलेको दृश्य छ । 

उक्त पाेस्टमा ५० हजारभन्दा बढी प्रतिक्रिया (लाइक र कमेन्ट आदि) आएका छन् । त्यस्तै सो भिडियाे १० लाखभन्दा बढी हेरिएको छ । 

यो भिडियो कात्तिक १७ गते जाजरकोटको रामीडाँडा केन्द्रविन्दु रहेकाे भूकम्पकाे हो कि हैन भनेर हामीले सत्यापन गरेका छाैँ। 

सत्यापनका क्रममा हामीले भिडियोमा देखिएको दृश्यका आधारमा किवर्ड बनायौँ । “live building collapse nepal earthquake 2015” लाई गुगलमा खोज्दा उक्त भिडियो फेला परेन । त्यसपछि हामीले सोही किवर्ड गुगल अन्तर्गतको भिडियो प्लेटफर्म युट्युबमा राखी खोज्यौँ । त्यसक्रममा हामीले युट्युब प्रयोगकर्ता सदिश मानन्धरले पोस्ट गरेको भिडियो फेला पायौँ । उनले उक्त भिडियो काठमाडौँको रामकोटको भएको जनाएका छन् ।

२०७२ साल वैशाख १२ गते ७.८ रेक्टर स्केलकाे भूकम्पले नेपालमा जनधनकाे ठूलाे क्षति गरेकाे थियाे । त्यसकाे दुई सातापछि त्यसैकाे परकम्प दाेलखा र सिन्धुपाल्चाेक केन्द्रविन्दु भएकाे ७.३ रेक्टर स्केलकाे भूकम्प गएकाे थियाे । 

कर्णाली प्रदेशको जाजरकोटमा हालै गएकाे भूकम्पकाे भनी फैलाइएकाे भिडियाेकाे दृश्य २०७२ सालकाे भूकम्पको हो। 

दाबी	दाबीकर्ता	नेपाल चेक निष्कर्ष
कर्णाली प्रदेशको जाजरकोटमा हालै गएकाे भूकम्पकाे भिडियाे	टिकटक प्रयाेगकर्ता	गलत