एउटा निर्माणाधीन घरमाथि असिना बर्षिएकाे भिडियो फेसबुक, एक्स, युट्युब लगायतका सामाजिक सञ्जालमा फैलिएको छ । उक्त पोष्टमा भिडियोको दृश्य नेपालकाे विराटनगरमा परेकाे असिना भन्ने दावी गरिएको छ । तर हामीले गरेको तथ्य जाँचमा सो भिडियो चीनकाे दक्षिणमा रहेको ग्वाङ्सीमा गत बैसाखमा परेकाे असिनाकाे भिडियो भएको फेला परेको छ।
साे छोटो भिडियो क्लिप नेपाल लगायत भारत र पाकिस्तानमा हालै परेकाे असिनाकाे भिडियो भन्दै सामाजिक सञ्जालमा फैलाइएकाे छ ।चिया खबर नामक फेसबुक पेजले “विराटनगरमा परेको असिना पानी । यत्रो असिना देख्नुभएको थियो त ?” भन्दै सेयर गरेकाे ३३ सेकेण्डकाे भिडियाेमा २६ हजार लाइक गरिएकाे छ भने ४ हजारभन्दा बढी सेयर गरिएकाे छ । सोही भिडियो फागुन १२ गते एक्समा @SGNepal नामक प्रयोगकर्ताले “याे विराटनगरमा परेको असिना हाे” भन्दै सेयर गरेका छन् ।
धिमाल इन्टरटेनमेन्ट लगायतका फेसबुक पेज र युट्युब च्यानलले पनि सोही भिडियो विराटनगरमा परेकाे असिनाकाे भन्दै सेयर गरेका छन् ।
के हो त यस भिडियोको वास्तविकता ?
हामीले उक्त भिडियोको स्क्रिनसट गुगल लेन्समा अपलोड गर्याै । तर त्यसमा उक्त भिडियो नेपाल र भारतमा परेकाे असिनाकाे भन्दै सेयर गरेकाे पाइयाे ।
सत्यापनका क्रममा हामीले भिडियोमा उक्त भिडियोलाई इनभिड नामक टुल प्रयाेग गरी कि फ्रेममा ढाल्याै । त्यस क्रममा सोही भिडियो @rainmaker1973 नामक एक्स अकाउन्टले दक्षिण चीनकाे ग्वाङ्सीमा गत बैसाख १५ गते परेकाे असिनाकाे भिडियो भनी सेयर गरेको पाइयो ।
त्यसैगरी सोही भिडियो @yangyubin1998 नामक एक्स अकाउन्टले दक्षिण चीनकाे ग्वाङ्सीमा दुई दिन परेकाे असिनाकाे भिडियो भनी गत बैसाख १५ गते नै सेयर गरेको फेला पर्यो ।
यस बा रे मा थप खाेज्दा सो घटना बा रे समाचार प्रकाशित भएको फेला परेन । तर सो घटना भएकाे भनिएकाे केही दिन अघि ग्वाङ्सीमा असिनापानी परेकाे द गार्डियनकाे एक समाचारमा उल्लेख गरिएको थियो ।
तसर्थ नेपालकाे विराटनगरमा परेकाे असिनाकाे भिडियो भन्ने दाबी गरिएको सामग्री भ्रामक छ।
| दाबी | दाबीकर्ता | नेपाल चेक निष्कर्ष |
| विराटनगरमा परेकाे असिनाकाे भिडियो। | सामाजिक सञ्जाल प्रयाेगकर्ता | भ्रामक |
नेपाल चेक 